fjárlög 2018.

Ég þakka hv. þingmanni fyrir svarið, virðulegi forseti. Þeir sem eru kannski dómbærastir á það hvort við stöndum okkur í því að veita þessa þjónustu hljóta að vera þeir sem hana þiggja. Það hefur komið fram og við vitum að fólk er almennt ekki sátt við hvernig komið er fyrir heilbrigðiskerfinu okkar, menntakerfinu, samgöngumálunum o.s.frv. þannig að einhvers staðar verðum við að hugsa upp á nýtt og gera betur.

Varðandi þessi fyrirtæki er þetta bara á miðlum núna. Við ættum kannski að kalla inn til okkar í fjárlaganefnd upplýsingar um þau fyrirtæki sem eru og hafa verið í heilbrigðisþjónustu og taka stöðuna frá hruni. Ég held að það sé hið besta mál að gera það og sjá hvernig þróunin hefur orðið.

Mig langar að koma aftur inn á lífeyrismálin og annað. Það er kannski í beinu framhaldi af því sem við erum að ræða hérna, hvernig við förum með skattfé hins almenna borgara. Fullur lífeyrir almannatrygginga hækkar núna um 4,7%, það er 10 þús. kall fyrir skatt, sem gerir það að verkum að hinn almenni lífeyrisþegi fær þá í kringum 238 þús. kr. Eftir skatt er þetta í kringum 6.700 kr. aukning. Það er ekki nema von að fólk spyrji: Hvenær er hægt að bæta þetta ef ekki núna? Þetta er stór hópur og kostar mikla peninga. En hvenær er þetta hægt ef ekki núna fyrir þennan lægststadda hóp og líka auðvitað fyrir fólk sem er á lágmarkstöxtum? Það má ekki gleymast í þessari umræðu. Ef ekki núna þegar vöxturinn hefur verið 7,2% á síðasta ári o.s.frv. Hvenær sér þingmaðurinn fyrir sér að við getum gert þetta? Því að ef við erum alltaf eftir á þá dregst (Forseti hringir.) þetta fólk alltaf aftur úr, það nær okkur ekki.