breyting á ýmsum lögum vegna fjárlaga 2018.
Herra forseti. Ég þakka hv. þingmanni fyrir ræðuna. Þingmaðurinn lýsti því áðan að hann væri ekki mjög hrifinn af skattahækkunum. En er það ekki svo að þegar við höfum verið á leiðinni upp á topp hagsveiflunnar hafi skattar verið lækkaðir? Hins vegar var því ekki sinnt að byggja nægilega vel undir innviðina. Þess vegna erum við í þessum vanda núna. Við erum öll sammála því við þurfum að byggja upp innviðina. Við erum á toppi hagsveiflunnar. Er þá ekki nauðsynlegt til að halda hér stöðugleika að hækka einmitt skatta á móti? Er það ekki eitruð blanda að ætla sér að lækka skatta og auka útgjöld einmitt í þeirri stöðu sem við erum? Ég vil spyrja hv. þingmann: Hefur hann ekki áhyggjur ef gera á þær breytingar á skattstofni fjármagnstekjuskattsins sem talað er um — nefnt hefur verið að skattleggja bara raunávöxtun — verði það til þess að ríkið verði af þeim tekjum sem þó er gert ráð fyrir í frumvarpinu?
Ég vil líka spyrja hv. þingmann: Er sú breyting ráðleg á neðra þrepi tekjuskattskerfisins á toppi hagsveiflunnar þegar verið er að gefa mikið í í útgjöldum? Ég vil biðja hv. þingmann að útskýra fyrir mér af hverju það er góð breyting og af hverju það muni ekki geta valdið tjóni og verið hagstjórnarmistök á þessum tímum.