148. löggjafarþing — 34. fundur,  6. mars 2018.

störf þingsins.

307. mál
[13:45]
Horfa

Kolbeinn Óttarsson Proppé (Vg):

Virðulegur forseti. Mig langar að eyða nokkrum orðum á Mílu og fleiri fyrirtæki sem ég ætla að nefna hér, gagnaveitu Farice, og stinga upp hugmyndum. Öll snúa fyrirtækin að netmálum. Þannig er háttað í sumum löndum í kringum okkur að allt er viðkemur neti, annars vegar ljósleiðara og aðgangi að internetinu, og hins vegar netinu er snýr að raforku, er skilgreint sem öryggismál. Sums staðar er það hluti af þjóðaröryggisstefnu, að mikilvægt sé að tryggja öllum íbúum hvers lands aðgang að þessum nauðsynlegu fyrirbærum í nútímasamfélagi.

Ég velti því upp hvort hæstv. ríkisstjórn ætti ekki að fara að huga að þessum málum. Uppi eru metnaðarfull áform um að klára ljósleiðaravæðingu landsins og er það vel. En ég held að það gæti verið einnar messu virði að setjast yfir þessi mál og skoða hvort ekki þurfi að setja undir sama hatt fyrirtæki sem ég taldi hér upp á undan, sem mundi kalla á víðtækt samráð við þá aðila sem að rekstri og eignarhaldi þeirra fyrirtækja koma.

Á næstunni munum við taka til umræðu breytingar á lögum um Landsnet. Þar þarf að skýra mjög sjálfstæði eiganda og væri alveg þess virði að setja undir sama hatt að skoða það í þessu samhengi. Þetta hefur verið skilgreint víða sem öryggismál. Það er ekki síst mál sem snýr að lífsgæðum, að tryggja að allir íbúar landsins hafi tryggt öryggi af annars vegar interneti og hins vegar raforku.