lögheimili og aðsetur.
Herra forseti. Ég þakka hv. þm. Helga Hrafni Gunnarssyni fyrir mjög yfirgripsmikla yfirferð um skýrslu nefndarinnar og hvaða leiðir eru lagðar til þar. Hv. þingmaður kom aðeins inn á það að þetta snýst bæði um hagsmuni barnanna og hagsmuni foreldranna. Við sem höfum starfað í fjölskyldugeiranum vitum mjög vel hvað það skiptir miklu máli fyrir börnin og foreldrana að njóta samvista. Ótal rannsóknir hafa sýnt fram á að samskipti og samvera með báðum foreldrum skiptir gríðarlega miklu máli fyrir uppvöxt barna.
Það er mikilvægt að tryggja þessar samvistir. Eins og hv. þingmaður kom inn á þá er þetta mjög oft vandamál jafnvel þegar engin vandamál eru til staðar á milli foreldranna. Allir eru kannski glaðir og ánægðir með skilnaðinn og samskipti varðandi börnin eru góð og annað slíkt, en fólk samt alltaf að ganga á vegg varðandi upplýsingar um börnin út af lögheimilisskráningu.
Mig langaði að spyrja hv. þingmann hvort hann telji ekki að það skipti hreinlega máli varðandi velferð barna að þessu verði breytt.