störf þingsins.

Virðulegi forseti. Gærdagurinn var stórmerkilegur. Róttæka sósíalistastjórnin undir forystu Katrínar Jakobsdóttur fékk 32 atkvæði með sinni óábyrgu og ósjálfbæru fjármálastefnu. Talsmenn sjálfbærari og ábyrgari fjármálastefnu fengu 16 atkvæði með sinni tillögu. Þetta tapaðist í gær en sá dagur mun renna upp að talsmenn ábyrgðar í ríkisrekstri verði á ný í meiri hluta í þessum sal.

Eitt af því síðasta sem gerðist sl. haust áður en allt fór í bál og brand var að ég fór í viðtal á sjónvarpsstöð og talaði um fjárlagafrumvarp þáverandi hæstv. fjármálaráðherra, besta fjármálaráðherra Íslandssögunnar, Benedikts Jóhannessonar, við hæstv. forseta, Steingrím J. Sigfússon. Það var gaman að sjá hversu vel og átakalaust sömu rök og hæstv. forseti færði fyrir máli sínu þá, runnu upp úr þingmönnum Sjálfstæðisflokksins í umræðunni í gær. Það var gaman að sjá það. Þeir eru greinilega fljótir að læra.

Dagurinn í gær var þó ekki til einskis þó að slagurinn hafi tapast. Það er alla vega hægt að segja að þegar Sjálfstæðisflokkurinn fer með þetta þjóðfélag ofan í gjána geta þeir ekki sagt að allir í bílnum hafi sagt þeim að gefa í.