störf þingsins.

Virðulegi forseti. Síðastliðinn mánudag var haldin ráðstefna um lýðháskóla á Íslandi í Norræna húsinu. Að ráðstefnunni stóðu þrír aðilar, LungA skólinn sem nú hefur starfað í fimm ár á Seyðisfirði, Lýðháskólinn á Flateyri sem áætlar að hefja starfsemi næsta haust og Ungmennafélag Íslands sem hefur áform um stofnun lýðháskóla á Laugarvatni. Segja má að þarna séu að myndast samtök lýðháskóla á Íslandi.

Á ráðstefnunni kom margt áhugavert fram. Þar fjallaði m.a. formaður dönsku samtakanna um lýðháskóla um reynslu af lýðháskólum annars staðar á Norðurlöndum og þýðingu skólanna fyrir einstaklinga og samfélag. Þar kom fram að rannsóknir sýna að nám í lýðháskóla dregur úr brottfalli nemenda úr formlegu námi og eykur líkur á að nemendur ljúki formlegri framhaldsmenntun.

Lýðháskólar höfða þó ekki eingöngu til nemenda sem eru í brottfallshættu. Mikið er um að námsmenn, sem vegnar vel í hefðbundna skólakerfinu, nýti tækifærin til að víkka sjóndeildarhringinn og átta sig betur á eigin styrkleikum og áhugasviði í gegnum nám í lýðháskólum.

Það er ákveðið tómarúm í íslensku menntakerfi hvað þetta varðar. Hér hafa lýðháskólar ekki verið starfræktir að staðaldri þrátt fyrir að umræðan um þá hafi hafist fyrir meira en hundrað árum. Samt er rétt að halda því til haga að starfsemi héraðsskólanna byggðist að einhverju leyti á hugmyndafræðinni um lýðháskóla og á meðan þeir störfuðu náðist í ýmsu sambærileg reynsla og þroski innan veggja þeirra. Eftir að þeir liðu undir lok er ákveðið tómarúm í náms- og þroskatækifærum ungs fólks á Íslandi sem lýðháskólar gætu fyllt upp í.

Eins og kunnugt er samþykkti Alþingi á árinu 2016 að fela mennta- og menningarmálaráðuneytinu að vinna frumvarp (Forseti hringir.) til almennrar löggjafar um lýðháskóla á Íslandi. Vil ég brýna ráðuneytið og ráðherra til að hraða þeirri vinnu.