störf þingsins.

Hæstv. forseti. EES-samningurinn sem ritað var undir 1. janúar 1994 er 24 ára á þessu ári og hefur haft mjög mikilvæg og jákvæð áhrif á íslenskt atvinnulíf. Kallað hefur verið eftir endurskoðun á honum frá vissum aðilum og ábyrgð alþingismanna er mikil, en eru alþingismenn alltaf nógu vel upplýstir þegar þeir greiða atkvæði um þessi mál?

Í þinginu liggur fyrir frumvarp um stofnun lagaráðs frá hv. þm. Önnu Kolbrúnu Árnadóttur sem hugsað er til að tryggja rétta lagasetningu sem gagnast þjóðinni. Frumvarpið hefur nokkrum sinnum verið flutt áður en ekki fengið framgang hingað til.

Ég hef fengið tölvupóst og símhringingar frá atvinnubílstjórum sem hafa verið á námskeiðum sem hafa verið haldin fimm helgar í röð. Hvert námskeið kostar um 20.000 kr. Þetta var gert að lögum fyrir nokkrum árum, innleitt frá EES. Í þeirri innleiðingu var tekið fram að þetta ætti ekki við um eyland en það varð engu að síður að lögum í trássi við greinina. Þeir vilja meina að í raun sé ekkert gagn að þessu því að þetta eigi ekki við íslenskar aðstæður.

Mér koma líka í hug vegaframkvæmdir og afhendingaröryggi raforku. Þá er ég ekki að hugsa um EES, heldur kærur og kæruferli. Það er t.d. ekki gott að hugsa til vegarins um Teigsskóg sem ekki hefur enn komist á koppinn. (Forseti hringir.) Það eru 12 ár síðan þetta var tilbúið til framkvæmda og ekkert hefur skeð. Kannski má segja að Alþingi hafi ekki staðið sig í stykkinu.