misskipting eigna í þjóðfélaginu.

Herra forseti. Ef við tölum um eignaójöfnuð þá var hér um áramótin fjármagnstekjuskattur hækkaður um 10%, þ.e. um 2 prósentustig, úr 20% í 22%. Ef við skoðum hvernig sú skattahækkun dreifist leggst hún fyrst og fremst á þá sem mesta eiga fjármunina, því að það eru auðvitað þeir sem borga hlutfallslega mestan fjármagnstekjuskatt.

Varðandi það sem hv. þingmaður vísar í, sem er endurskoðun á skattstofni fjármagnstekjuskatts, þurfum við auðvitað að taka afstöðu til þess sem kemur út úr þeirri skoðun. Hv. þingmaður nefnir tekjulægri hópa og það er alveg skýrt og kom ítrekað fram í umræðum um fjármálaáætlun að þar er gert ráð fyrir 1 prósentustigs skattalækkun á tekjuskattinn en um leið boðað að samráð verði haft við aðila vinnumarkaðarins, þ.e. launafólk, um það hvernig hægt verði að útfæra skattalækkun þannig að hún komi hinum tekjulægri mest til góða. Í fjármálaáætlun er sérstök rammagrein um það hvernig mætti gera þetta í gegnum persónuafsláttarkerfið sem er í takt við það sem verkalýðshreyfingin hefur talað fyrir.

Hins vegar var á það bent í umræðum um fjármálaáætlun að það væri mikilvægt (Forseti hringir.) að það væri aukið samtal um þessi mál, ekki bara við aðila vinnumarkaðarins heldur líka hér á þingi og ég held að það sé réttmæt gagnrýni. Ég held að við munum þurfa að gefa okkur tíma í að ræða það hvernig skattbreytingar (Forseti hringir.) munu nýtast sem best tekjulægri hópum. Afsakið, forseti.