skattlagning styrkja til lyfjakaupa o.fl.

Virðulegur forseti. Ég þakka hæstv. ráðherra fyrir svörin og ég vona heitt og innilega að hann kynni sér þetta og ég vona heitt og innilega að þetta mál komist inn í þingið og við getum afgreitt það með sóma þannig að þeir einstaklingar sem lifa í sárri fátækt þurfi ekki að verða fyrir því að slíkir styrkir séu notaðir til að klekkja á þeim og skerða bætur þeirra langt út fyrir það sem eðlilegt getur talist.

Í framhaldinu vil ég spyrja ráðherra, vegna þess að við áttum orðaskipti 9. apríl sl. um töku á hálfum lífeyri og þá sagði ráðherra orðrétt, með leyfi forseta:

„Ég vil segja hér að á leiðinni er mál, ef það er ekki komið til þingsins er það á leiðinni, til að gera breytingar á þessu og koma í veg fyrir þá glufu sem þarna myndast og hv. þingmaður kom inn á.“

Ég spyr ráðherra: Hvar er þetta mál? Nú er kominn 2. maí. Er það á leiðinni? Er það einhvers staðar fast? Hvar er það statt í kerfinu?