loftslagsmál og samgöngur.

Hæstv. forseti. Ég vil byrja á að þakka hv. þingmanni fyrir fyrirspurnina. Ef mér skjátlast ekki held ég að hann hafi kallað mig fjármálaráðherra, sem er nú kannski alveg eftir bókinni en við sættum við okkur við það í bili.

Ég vil byrja á að taka undir með hv. þingmanni að sú skýrsla sem unnin var að beiðni ráðuneytisins, og er þriðja vísindaskýrslan sem unnin er hér á Íslandi um loftslagsbreytingar, og var stýrt af Veðurstofu Íslands, dregur upp þá mynd að hér hafi orðið allmiklar breytingar vegna loftslagsbreytinga, á lífríki og líka á físískum þáttum eins og jöklum, og að hér sé að vænta breytinga sem við verðum að líta til í framtíðinni.

Þar er ekki síst verið að horfa til þess að Íslendingar þurfa líka að aðlagast loftslagsbreytingum þó að við þurfum fyrst og fremst að sjálfsögðu að draga úr losun til að koma í veg fyrir að breytingarnar verði. Þar erum við hluti af alþjóðasamfélaginu og þar hefur ríkisstjórnin, sem hér er við völd núna, tekið þann pól í hæðina að fylgja Evrópuþjóðum, eins og hv. þingmaður veit, með því að stefna að 40% samdrætti árið 2030 í útlosun gróðurhúsalofttegunda en ganga síðan skrefinu lengra árið 2040 og ná þá fram því sem kallast kolefnishlutleysi.

Í ráðuneyti mínu er verið að vinna að gerð aðgerðaráætlunar sem tekst á við þessi mál og hvað varðar sérstaklega skuldbindingar Íslands gagnvart Parísarsamkomulaginu. Nýju loftslagsráði verður síðan falið að skoða hvaða leiðir eru fyrir hendi þegar kemur að kolefnishlutleysinu en það er alveg ljóst að við þurfum að ná árangri á þessum sviðum. Ég kem betur að sérstökum spurningum á eftir í seinna svari.