störf þingsins.

Hæstv. forseti. Í gær var hér í þingsal stutt umræða um loftslagsbreytingar, áhrif þeirra á lífríki og mannlíf og vanda af þeim sökum sem þarf að bregðast hart við. Annar og grafalvarlegur vandi sem heimsbyggðin stendur frammi fyrir er plastmengun sem ógnar lífríkinu. Um höfin fljóta plastdræsur af ýmsum toga og valda miklum skaða, fljóta upp að strandlengjum landa og út aftur og skaða og meiða og drepa fugla, fiska, hvali og önnur sædýr.

Gegnum skolp og frárennsli af ýmsum toga berast örsmáar plastagnir til sjávar, fara inn í lífkeðjuna og enda svo í maga mannsins á endanum og valda heilsutjóni. Örplast berst til sjávar í hvert skipti sem þvottavélar okkar losa út þvotta- og skolvatn því að í langflestum flíkum okkar er að finna plast, agnir og þræði sem smám saman leysast upp og berast eins og fyrr sagði út í vatnið.

Mesta plastmengunin kemur frá bíldekkjum eða um 60%, hún kemur líka úr málningu og örplast er að finna í flestum snyrtivörum. Plast er þægilegt efni og því notað víða. Meðal annars höfum við ofnotað plastpoka eins og allir vita og þeir eru nú bannaðir í sumum löndum. Sem betur fer eru almenningur og stjórnvöld orðin meðvitaðri um að þetta er vandi sem við þurfum að taka á við.

Ég vil fagna þeirri ályktun sem var samþykkt hér á Alþingi 25. apríl um að rannsaka örplast í lífverum sjávar í Norður-Atlantshafi í samstarfi við Færeyinga og Grænlendinga. Ég vil líka taka fram að umhverfisráðherrar Norðurlanda hafa samþykkt samnorræna áætlun um leiðir til að draga úr umhverfisáhrifum plasts.