Afbrigði um dagskrármál.

Virðulegur forseti. Það er mjög sérkennilegt að þetta mál skyldi ekki koma fram fyrir 1. apríl því að legið hefur fyrir lengi að ákveðnar tegundir útgerða hafi verið í vandræðum vegna þess með hvaða hætti veiðigjöldin leggjast á. Hvers vegna birtist þetta mál allt í einu núna? Og, sem er ekki síður undarlegt, hvers vegna er það með þeim hætti sem það er? Ekki er tekið sérstaklega á vanda litlu útgerðanna. Ekki er verið að bregðast við vandanum sem legið hefur fyrir lengi, með þessu frumvarpi. Þetta frumvarp mun auk þess hafa verið unnið í sjávarútvegsráðuneytinu en er svo lagt fram sem þingmannamál. Hvers vegna er það, virðulegur forseti? Það er allt mjög dularfullt.