stefnuræða forsætisráðherra og umræður um hana.

Kæru landsmenn. Það er kjaravetur fram undan. Það er gott að hafa í huga þá sögu úr stjórnartíð Nicolaes Ceausescus í Rúmeníu þegar engu máli skipti hve kalt var úti, opinberar tölur sögðu alltaf að það væru tíu gráður yfir frostmarki. Ástæðan var sú að þá þurfti ekki að kynda opinberar byggingar. Opinberum tölum var hagað algerlega eftir seglum hvað það varðaði. Fólk fann að sjálfsögðu að það var kalt og þessi sparnaður stjórnvalda kostaði að sjálfsögðu traust.

Nú hefur hægri sinnaða tímaritið Economist bæst í hóp þeirra sem vara stjórnmálamenn, viðskiptalífið og stjórnsýsluna í hinum vestræna heimi, alvarlega við því að vaxandi ójöfnuður og vantraust sé að grafa undan frjálsum, opnum lýðræðissamfélögum. Ef við viljum halda í þessi frjálsu lýðræðissamfélög, það er tilgangur Pírata, grunnstefnan okkar, að verja það og efla, þá höfum við ekki efni á því að segja fólki að það sé ekki kalt vegna þess að meðalhitinn í samfélaginu sé einhvern veginn yfir tíu gráðum.

Sagt er að stigbreytingin á orðinu lygi sé: lygi, haugalygi og tölfræði. Það er þar af leiðandi hættulegt á komandi vetri ef stjórnvöld nota tölfræði til að mála mynd sem stór hópur samfélagsins veit að er ekki sönn. Hann finnur það bara í sínu daglega lífi. Fólk veit alveg hvort það getur leyft sér meira í dag en í fyrra. Fólk finnur alveg á matarpokunum sínum hvort það kemst meira í þá, hvort það þurfi að bera meira úr búðinni. Fólk veit alveg hvort það þarf að vinna meira þennan mánuðinn en í mánuðinum í fyrra til að geta náð endum saman, til þess að geta rekið heimilið sitt. Fólk veit þetta alveg. Samt er ein mynd sem byrjað er að mála, og það er mikilvægt að við endurskoðum þetta og séum heiðarleg með það, að laun hafi hækkað og kaupmáttur aukist sem þýði að flestir hafi fleiri krónur og hver króna kaupi meira. En þetta er bara hálf myndin, hálfur sannleikurinn. Langflestir vita að sú mynd er þannig. Því að fyrir stóran hóp heimila hefur húsnæðiskostnaðurinn étið upp fleiri krónur og meiri kaupmátt en koma inn á heimilið. Þau heimili eru verr stödd þrátt fyrir kaupmáttinn. Þetta verðum við að taka inn í myndina.

Þegar fólki er kalt mun það krefjast meiri hita. Það mun gera það í stjórnmálunum eins og við sjáum í kringum okkur, ef það er ekki önnur leið. Guði sé lof fyrir verkalýðsfélögin að þau eru farin að standa í lappirnar og krefjast kjarabóta á Íslandi og krefja stjórnvöld um að þau stígi inn í, eins og t.d. í húsnæðismálunum.

Stjórnarsáttmáli ríkisstjórnar Katrínar Jakobsdóttur segir, með leyfi forseta:

„Ríkisstjórnin mun beita sér fyrir samstilltu átaki með aðilum vinnumarkaðarins til að tryggja að kjarasamningar skili launafólki og samfélaginu raunverulegum ávinningi.“

Ef raunveruleg heilindi eru um þetta, segjum þá hlutina eins og þeir eru. Vinnum af heilindum að þessu. Þá munu Píratar styðja ríkisstjórnina í kjaramálum.