fjárlög 2019.
Virðulegi forseti. Ég þakka hv. þingmanni andsvarið. Já, það er rétt að afkoma sauðfjárbænda er ekki góð. Ég vil engu að síður meina að Alþingi hafi brugðist ágætlega við í desember á síðasta ári þegar samþykkt voru aukaframlög inn í þessa grein sérstaklega, upp á 665 millj. kr.
Engu að síður er hljóðið úr greininni með þessum hætti og við vitum að við erum að framleiða töluvert umfram innanlandsneyslu og höfum lent í erfiðleikum með það að afsetja aðra framleiðslu erlendis, þó svo að óvenjuvel hafi gengið í ár þannig að birgðir eru með lægsta móti á þessu ári.
Eins og ég nef nefnt í fyrri andsvörum erum við í ágætisviðræðum við sauðfjárbændur. Ég vænti þess og treysti að við munum ná saman á grundvelli þeirra ákvæða sem í stjórnarsáttmálanum eru sem kveða á um nýja nálgun á þessu verkefni. Ég vona heitt og innilega að við berum gæfu til að komast að samkomulagi tímanlega í haust þannig að við getum keyrt þessar breytingar helst í gang um áramót.
Hv. þingmaður spyr um matvælastefnuna. Þessi vinna er tiltölulega nýlega farin af stað. Verkefnisstjórnin sem þarna er að störfum á að hafa forgöngu um það að móta matvælastefnu fyrir landið og draga fram áherslur stjórnvalda eins og þær birtast í stjórnarsáttmálanum ásamt því að við reynum að fá einhverjar tillögur sem snúa að framtíðarsýn fyrir málaflokkana. Verkefnaskil í þessu eru þannig að ég á að fá til mín áfangaskýrslur í janúar 2019 og september 2019 með það að markmiði að við getum verið með heildstæða stefnu á þessu sviði í árslok á næsta ári, þ.e. í lok ársins 2019.