framhaldsfundir Alþingis.

Hv. alþingismenn. Alþingi kemur nú saman til framhaldsfunda að loknu jólahléi og ég býð alla hv. alþingismenn sem og starfsfólk Alþingis velkomið til starfa.

Ekki er svo að skilja að setið hafi verið auðum höndum undanfarna daga. Þannig funduðu nefndir þingsins í síðustu viku og einnig þingflokkar. Það má búast við annasömum tíma á vetrarþingi þegar ýmis stór mál koma til kasta Alþingis. Þó að skiptar skoðanir séu vissulega um mörg þeirra mála sem við eigum eftir að ræða vona ég að okkur auðnist að halda áfram því góða samstarfi sem hér ríkti á haustþinginu. Það væri líka góður svipur á því að halda þingstörfum innan ramma starfsáætlunar Alþingis líkt og okkur gekk svo vel með á haustþingi.

Ég hef áður ítrekað mikilvægi þess að þingmenn geti skipulagt störf sín eftir starfsáætlun þingsins, að starfsáætlunin sé frágengin og birt tímanlega og sé þannig liður í bættu skipulagi og auknum fyrirsjáanleika í störfum Alþingis. Í þessu sambandi skiptir líka máli að Alþingi hafi reglulegar og góðar upplýsingar frá Stjórnarráðinu um þau mál sem ráðherrar ætla að leggja fyrir þingið. Það er því ánægjuefni að á þessu kjörtímabili hefur komist á sú venja að hæstv. forsætisráðherra eigi samráðs- og upplýsingafundi með forystu þingsins um slík mál, ekki síst um framvindu þingmálaskrár ríkisstjórnarinnar. Fagna ég þessum vilja hæstv. ráðherra og tel til mikilla bóta jákvæða þróun í gagnkvæmri upplýsingamiðlun milli framkvæmdarvalds og löggjafarvalds.

Eins og hv. alþingismönnum er kunnugt tóku um áramót gildi breytingar á lögum um þingfararkaup alþingismanna og þingfararkostnað sem er ætlað að skapa lagaramma utan um ráðningu starfsmanna þingflokka. Með fjölgun starfsmanna þingflokka á þessu kjörtímabili verður hægt að auka aðstoð við þingmenn en um leið er þess vænst að sú ráðstöfun styrki almennt Alþingi og starf þess.

Ég vil greina hv. þingmönnum frá því að forsætisnefnd hefur samþykkt breytingar á reglum um skráningu á fjárhagslegum hagsmunum alþingismanna. Þær breytingar felast m.a. í því að skýra betur hlutverk skrifstofu Alþingis er kemur að leiðbeiningum og ráðgjöf til þingmanna um hvernig skal taka á brotum vanræki þingmaður að skrá hagsmuni sína. Þá er tekið upp ákvæði um skráningu á skuldum þingmanna að sænskri og finnskri fyrirmynd. Skrá skal skuldir, sjálfskuldarábyrgðir og aðrar ábyrgðir sem tengjast rekstri fasteigna eða atvinnustarfsemi og eru hærri en mánaðarlegt þingfararkaup. Breytingarnar taka gildi 1. febrúar nk. og skulu þingmenn sem falla undir áðurgreindar reglur um skuldir og ábyrgðir skrá þær fyrir 1. maí nk. Hv. þingmönnum verða sendar nánari upplýsingar um þessar breytingar á næstunni.

Síðar á þessum fundi fer fram umræða um stöðuna í stjórnmálum og verkefnin fram undan. Það er ánægjulegt að sú venja skuli vera að festast í sessi að hefja þingfundi eftir jólahlé með slíkri almennri stjórnmálaumræðu milli forystumanna flokkanna, auk þess sem tækifæri gefst til að koma með innlegg í umræðuna með andsvörum.

Ég vil hafa sem mín lokaorð hér við upphaf vetrarþings að ég vona að við getum í störfum okkar á komandi vikum og mánuðum átt gott og uppbyggilegt samstarf, sameinast um að sýna hvert öðru vinsemd og virðingu þó svo að við tökumst á um málefni og á slíkum grundvelli skilað góðu verki.