Bráðabirgðaútgáfa.

149. löggjafarþing — 54. fundur,  21. jan. 2019.

staðan í stjórnmálunum í byrjun árs og verkefnin framundan. Munnleg skýrsla forsætisráðherra. - Ein umræða.

[17:43]
Horfa

Halldóra Mogensen (P) (andsvar):

Forseti. Kollegi minn var að benda mér á að í ræðu hæstv. forsætisráðherra þá minntist hún á að tillögur stjórnlagaráðs ættu að vera til hliðsjónar á meðan ég tel að þær ættu að vera til grundvallar. Það er munur þar á. Ég vildi bara að það kæmi skýrt fram.

Varðandi þessa blessuðu sátt þá þarf bara meiri hluta til að samþykkja nýja stjórnarskrá. Það verður aldrei sátt um það, þessi fullkomna sátt. Ég sé ekki að það sé nokkurn tímann að fara að gerast. Svo er líka spurning um hvort þeir flokkar sem vilja fá nýja stjórnarskrá fái þá vonandi brautargengi til þess í næstu kosningum. Það er viss sátt sem þjóðin gæti sýnt. En þessi fullkomna sátt, að hver einasti flokkur á þessu þingi verði sáttur við stjórnarskrána — það er ekki að fara að gerast. Við þurfum að nálgast þetta á annan hátt. Þjóðin þarf að koma með sáttina. Þjóðin þarf að segja okkur til verka.