fimm ára samgönguáætlun 2019--2023.

Virðulegi forseti. Þetta er alveg gríðarlega áhugavert. Hvað gerist þegar eignatekjurnar fara að rýmkast til? Þær eiga sem sagt ekki að fara í samgöngur því að fólk verður farið að borga veggjöld fyrir að fara þessa vegi. Á þá að nýta eignatekjurnar í eitthvað annað? Eða á umsvifalaust að borga niður þessar samgöngubætur, þau lán, þannig að fólk hætti að borga veggjöldin þegar búið er að ákveða hvernig ráðstafa á þessum eignatekjum?

Aftur aðeins að EuroRAP, spurning sem ég vil fá svar við. Þegar verið var að pæla í vegaframkvæmdum á Vestfjörðum, hvaða leið ætti að fara o.s.frv., var hluti af aðalleiðinni samkvæmt heimamönnum C7-vegur, en hann er skráður C8-vegur, hann þyrfti að fara í uppfærslu til þess að anna eftirspurninni og álaginu ef orðið hefði af R-leiðinni. Og þegar Vegagerðin var spurð um þetta sagði hún að u.þ.b. helmingurinn af þeim vegum sem væru á skrá hjá þeim væru í raun verri vegir en skráningin segir til um. Það er mjög áhugaverð fullyrðing, (Forseti hringir.) verð ég að segja, og setur samgöngukerfið okkar jafnvel í enn verra ástand en menn vilja vera láta.