meðferð krónueigna sem háðar eru sérstökum takmörkunum og gjaldeyrismál.
Herra forseti. Ég þakka hv. þingmanni andsvarið. Ég geri mér ekki miklar vonir um að frumvarpið verði ekki samþykkt. Við sjáum að stjórnarmeirihlutinn ætlar sér að keyra málið í gegn og í krafti meiri hlutans mun þeim eflaust takast að gera það. Ég verð að segja að það er að sjálfsögðu á ábyrgð þeirra að koma með þetta mál hér inn. Verði frumvarpið að lögum er að mínum dómi veruleg hætta á því að það geti haft áhrif á stöðu efnahagsmála og stöðu kjaraviðræðna o.s.frv., sem er þá á ábyrgð ríkisstjórnarinnar. Ég held að ég svari spurningunni því á þann veg að ég held að þeim muni takast að koma málinu í gegn í krafti meiri hlutans.
Við höfum verið að reyna að fá fram allar upplýsingar. Enginn úr stjórnarmeirihlutanum hefur viljað koma inn í umræðuna. Annaðhvort eru þau áhugalaus um málið eða hafa ekki mikinn áhuga á því að fá svör við mikilvægum grundvallarspurningum. Það vekur náttúrlega undrun að ákveðnir stjórnmálaflokkar skuli ekki hafa nokkurn áhuga á því að taka þátt í umræðunni. Ég nefni t.d. Samfylkinguna sem, eins og ég sagði fyrr í ræðu, hefur gefið sig út fyrir að vera sérstakur talsmaður launamanna í landinu. Formaður Samfylkingarinnar hefur haldið miklar ræður hér um stöðu kjaraviðræðna og það hvernig komið er fram við verkafólk í landinu en hann hefur engan áhuga á að taka þátt í umræðu um mál sem getur haft veruleg áhrif á kjör almennings í landinu, það er bara þannig. Það vekur að sjálfsögðu spurningar um það hver tilgangurinn er.