meðferð krónueigna sem háðar eru sérstökum takmörkunum og gjaldeyrismál.

Virðulegur forseti. Aðeins nokkur orð til að ramma inn þessar tölur. Fyrst er það 23 milljarða talan, rammast inn af 190 kr. á evru, viðmiðinu sem lagt var af stað með í upphafi samanborið við gengi dagsins í dag. Hins vegar eru neðri mörkin 16,4% afföllin sem aflandskrónueigendur sömdu um hinn 12. mars 2017, þegar 90 milljarða stabbinn fór í gegn.

Fyrir upphæðir á þessu bili, 13,6–23 milljarða, bara til að setja þetta í samhengi, ef við horfum á seinni hluta samgönguáætlunar eins og hún var lögð fram og fjárveitingarnar sem rammaðar eru inn í ríkisfjármálaáætlun ríkisstjórnarinnar, þá eru áætlaðir 7,8 milljarðar til nýframkvæmda á árunum 2022 og 2023. Það er á sextánda milljarð, þessi tvö ár í heildina. Neðri mörkin fara langt með að tomma allar nýframkvæmdir á árinu 2022 og 2023. Efri mörkin, 23 milljarðarnir, eru u.þ.b. helmingur á árinu 2021 á móti.

Hæstv. ríkisstjórn lítur þannig á að hér sé stórsókn í gangi í samgöngumálum með tímabundnu viðbótarframlagi sem skilar heildarfjárveitingum upp á 15,5 milljarða til vegaframkvæmda á árinu 2019, 2020 og 2021. Það er örlítið yfir neðri mörkunum, vel innan marka, eða 1,5 ár af þessu stórátaki sem efri mörkin skila. Í samhengi við samgöngumálin þá eru þetta auðvitað risavaxnar tölur, algerlega risavaxnar.