meðferð krónueigna sem háðar eru sérstökum takmörkunum og gjaldeyrismál.
Virðulegur forseti. Ég þakka hv. þm. Gunnari Braga Sveinssyni fyrir ræðuna. Hörður Ægisson blaðamaður var að öðrum ólöstuðum sennilega sá blaðamaður sem setti sig best inn í þessi mál, að manni sýndist úr fjarska þegar á þessu stóðu öllu. Hv. þm. Gunnar Bragi Sveinsson hefur hér verið að líta í þau skrif hans og fara í gegnum þau. Er eitthvað sem hv. þingmaður hefur rekið augun í af því sem Hörður Ægisson skrifaði á þessum tíma sem hefur ekki haldið, ef svo má segja? Eða virðist hann hafa hitt naglann ítrekað þannig á höfuðið að skynsamlegt væri hjá núverandi stjórnvöldum að fá greinasafnið sem hv. þingmaðurinn er með á borðinu fyrir framan sig lánað og lesa sig í gegnum það áður en þau taka endanlega ákvörðun um að gera atlögu að því að keyra málið í gegnum 3. umr. og atkvæðagreiðslu? Það sem hv. þm. Gunnar Bragi Sveinsson hefur haft eftir úr þessum greinum í kvöld hefur allt verið þeirrar gerðar að mikið vit er í og oft er gests augað glöggt og þarna horfir blaðamaðurinn á þessi mál verandi staðsettur utan hinna daglegu stjórnmála. Ég ítreka spurninguna: Er eitthvað í þessu sem eldist illa, ef svo má segja?