meðferð krónueigna sem háðar eru sérstökum takmörkunum og gjaldeyrismál.

Frú forseti. Ég þakka hv. þingmanni fyrir andsvarið.

Fyrst vil ég fá að lesa upp úr frumvarpinu sem liggur fyrir, 6.4. Áhrif á ríkissjóð, með leyfi forseta, fyrst hv. þingmaður kom inn á það. Þetta er ekki löng klásúla.

„Hvorki er gert ráð fyrir að þær breytingar sem í frumvarpinu felast hafi teljandi áhrif á tekjur ríkissjóðs né gjöld. Verði frumvarpið óbreytt að lögum verður ekki séð að það muni hafa áhrif á afkomu ríkissjóðs.“

Ég verð að viðurkenna að ég skil þessa málsgrein ekki og vil svo gjarnan fá einhverjar útskýringar á henni, annaðhvort frá framsögumanni nefndarálits meiri hlutans eða starfandi fjármálaráðherra. En það er bara einföld skynsemisskoðun á þessum texta, samanborið við efnisatriði málsins, sem orsakar að þetta gengur hreinlega ekki upp.

Hvað varðar það síðan að í engu sé reynt að gera grein fyrir hver fjárhagslegu áhrifin eru í frumvarpinu, greinargerð eða nefndarálitinu, lýsi ég hér enn og aftur furðu minni á því hversu ódýrt er skautað fram hjá slíkum atriðum og í raun ekkert komið inn á þau. Þetta er auðvitað ekki boðlegt, eins og ég kom inn á nokkrum sinnum í gær og nótt, að segja: Þið, ágætu þingmenn Miðflokksins, getið bara fundið svör við þessum spurningum ykkar í frumvarpsplagginu eða nefndarálitinu eða þeim ræðum tveimur sem haldnar hafa verið af fulltrúum stjórnarflokkanna — þegar staðreyndin er sú að í hvorugu þessara plagga og í hvorugri þeirra ræðna sem fluttar voru kemur neitt af þessum atriðum fram. Það er auðvitað mjög miður og vart boðlegt.