störf þingsins.

Herra forseti. Það er orðið ljóst að miklir meinbugir hafa verið á stjórnsýslu Seðlabanka Íslands varðandi gjaldeyriseftirlitið. Þetta kemur m.a. fram í svari forsætisráðherra við skriflegri fyrirspurn minni. Margt í sambandi við rekstur eignasafns Seðlabankans vekur auk þess spurningar. Nauðsynlegt er að varpa ljósi á það hvort þar sé einnig pottur brotinn. Eignasafn Seðlabankans og dótturfélag þess Hilda ehf. hafa undanþágur frá upplýsingalögum samkvæmt ákvörðun stjórnvalda.

Undanþáguna átti að endurskoða eigi síðar en 15. desember á síðasta ári. Starfsemi eignasafnsins og dótturfélagsins Hildu ehf. varðar almenning miklu. Þessi félög hafa séð um að koma miklum eignum ríkisins í verð. Í kjölfar falls fjármálafyrirtækja á Íslandi haustið 2008 var Seðlabanki Íslands stór kröfuhafi í bú innlendra fjármálafyrirtækja. Kröfurnar voru tryggðar með veðum af ýmsum toga. Miklir almannahagsmunir eru í húfi þar sem eignarhaldsfélagið og Hilda ehf. hafa stundað eignaumsýslu bak við luktar dyr árum saman með mörg hundruð milljarða króna eignir almennings. Seðlabankinn hefur nú óskað eftir áframhaldandi undanþágu frá upplýsingalögum til handa áðurnefndum félögum.

Herra forseti. Ég tel eðlilegt að hafna þeirri beiðni og að opnað verði fyrir gegnsæi, sérstaklega í ljósi þess sem fram hefur komið að undanförnu varðandi meinbugi á stjórnsýslu Seðlabanka Íslands. Eignasafnið sýslaði með um hundruð milljarða eigna Íslendinga og eðlilegt að opinber grein sé gerð fyrir þeirri vinnu. Það þarf að eyða öllum grun um að þarna hafi verið stunduð fyrirgreiðsla eða spákaupmennska.