fjármálaáætlun 2020--2024.

Virðulegi forseti. Hv. þingmaður hefur alveg frá árinu 2017 verið að vara við því að það hlyti að fara að kólna í hagkerfinu og sagt að forsendur fjárlaga 2018 og fjármálaáætlunin sem á því ári var samþykkt og sömuleiðis þessar séu allt of bjartsýnar og taka þurfi þetta allt til endurskoðunar, en fram til þessa hefur það ekki gengið eftir. Hagvöxtur á árinu 2018 var reyndar meiri en við gengum út frá og afkoma ríkisins stóðst áætlanir á árinu 2018, voru reyndar með rétt rúmlega áætlaða afkomu á árinu 2018, þrátt fyrir það sem hv. þingmaður hefur alltaf kallað fordæmalausa útgjaldaaukningu. Nú kemur hv. þingmaður enn og aftur og segir að það séu óvissutímar og við segjum það beinlínis sömuleiðis í þessari fjármálaáætlun. En á bls. 27 er að finna þjóðhagsyfirlit samkvæmt þjóðhagsreikningum og hagspá Hagstofu Íslands og við höldum okkur bara við það að opinberar spár gera ráð fyrir því að hér verði hagvöxtur. Það getur ekki verið að við séum stödd í umræðu um að við eigum að nota eitthvað annað viðmið en það.

Hins vegar tók ég eftir því að hv. þingmaður, líkt og hv. þm. Oddný G. Harðardóttir gerði fyrr í dag, fór aðeins að slá varnagla við því að menn færu að endurskoða stefnuna, það mætti alls ekki gera. En hvernig sér hv. þingmaður eitthvert vit í því ef hagvöxtur hverfur t.d. á Íslandi að við þurfum að halda okkur við fjármálastefnu frá desember 2017 vegna ársins 2020? Þá sáum við fram á að það yrði ágætishagvöxtur árið 2020 en ef þær forsendur eru allar farnar, eins og hv. þingmaður óttast og við gætum gengið út frá því í þessari umræðu að það yrði enginn hagvöxtur á næsta ári, er hv. þingmaður að segja: Við eigum samt að ná 0,9% afkomu hjá ríkissjóði?