menntun, hæfni og ráðning kennara og skólastjórnenda við leikskóla, grunnskóla og framhaldsskóla.

Hæstv. forseti. Ég þakka hæstv. ráðherra svarið. Ég verð að játa að ég er ekki alveg fullkomlega sannfærður en geri ráð fyrir að hv. allsherjar- og menntamálanefnd muni skoða þau atriði betur. Ég hef samt meiri áhyggjur af öðru sem hefur aðeins verið í umræðunni í samfélaginu eftir að frumvarpið kom fram. Heyrst hafa athugasemdir, og sumar hverjar alvarlegar, frá samtökum kennara og kannski meira frá einstökum kennurum á mismunandi skólastigum um hvort þetta sé skynsamlegasta skrefið að taka núna eða hvort það eigi að vera lengri aðlögunartími en gert er ráð fyrir í frumvarpinu.

Mig langar í seinna andsvari að inna hæstv. ráðherra eftir því hvort hún telji að sá tími sem er gefinn til gildistökunnar — fer ég ekki rétt með að það sé 1. júlí 2019, sem eru þá væntanlega örfáir mánuðir eða jafnvel örfáar vikur frá samþykkt frumvarpsins? — sé nægur fyrir stofnanir ráðuneytisins og skólana í landinu til að taka á nýju og breyttu umhverfi?