frysting fjármuna og skráning aðila á lista yfir þvingunaraðgerðir í tengslum við fjármögnun hryðjuverka og útbreiðslu gereyðingarvopna.
Herra forseti. Ég þakka hæstv. ráðherra fyrir framsöguna. Ég held að við séum flest alveg sammála um markmiðin sem hér er talað fyrir sem snúast um að koma í veg fyrir fjármögnun hryðjuverka og útbreiðslu gereyðingarvopna. En ég verð að segja, eins og fram hefur komið í andsvörum, að þetta frumvarp er pínulítið torf að lesa í gegnum.
Mig langar því að vita hvort hæstv. ráðherra geti aðeins varpað ljósi á og hjálpað mér að skilja það sem er fjallað um í 9. gr., sem fjallar um tilnefningu á lista öryggisráðs Sameinuðu þjóðanna yfir þvingunaraðgerðir. Þar er í c-lið talað um upplýsingar um aðferðir og fjármuni sem notaðir hafa verið við fjármögnun hryðjuverka eða útbreiðslu og fjármögnun gereyðingarvopna. Síðar í 9. gr. koma aftur stafliðir sem eru merktir a, b og c o.s.frv. og þar er í a-lið á bls. 5, talandi um torf, aftur fjallað um útbreiðslu og fjármögnun gereyðingarvopna. Ég finn ekkert um þetta í því sem fjallað er um í 9. gr. Mig langar því að spyrja hæstv. ráðherra hvort hann geti varpað einhverju ljósi á það. Í hvaða samhengi erum við að tala um þetta hérna? Erum við að tala um fjármögnun á gereyðingarvopnum almennt, sem er mjög mikilvægt markmið eitt og sér, eða er þetta í einhvers konar þrengra samhengi sem snýst þá um að gereyðingarvopn komist ekki í hendur tiltekinna hópa? Það er líka mjög mikilvægt atriði en það (Forseti hringir.) skiptir samt máli í heildarsamhengi hlutanna hvað er í raun verið að fjalla um hérna.