ákvörðun sameiginlegu EES-nefndarinnar, nr. 93/2017, um breytingu á IV. viðauka (Orka) við EES-samninginn.

Herra forseti. Það eru mörg málin sem eru aðkallandi inn í þessar umræður. [Hlátur í þingsal.] Mér er mjög ofarlega í huga hversu vanbúið og vanreifað málið er. Eigum við að nefna nokkur dæmi? Það stendur yfir leit að lagalega fyrirvaranum og við erum með mann í því sem hefur sérþekkingu á lögreglustörfum, verandi lögreglustjóri og skólastjóri Lögregluskólans, og er fyrir sitt leyti að vinna í málinu. [Hlátur í þingsal.] — Ég óska eftir því að herra forseti gæti að því að halda uppi reglu á fundinum.

Hann mætti hér í ræðustól fyrr í dag og lagði fram áfangaskýrslu í málinu. Hann var búinn að finna fimm tilgátur eða fullyrðingar um það hvar lagalega fyrirvarans væri að leita. Nema hvað. Ég skaut að honum að ég hefði lagt leið mína inn á fjölsóttan samfélagsmiðil, sem í máli manna er stundum kallaður Facebook, og þá hafði ágætur þingmaður Framsóknarflokksins ritað af mikilli hind og lögfræðilegri þekkingu um lagalega fyrirvarann eða fyrirvarana og mátti greina í máli hv. þingmannsins einar tvær eða þrjár tilgátur um þennan lagalega fyrirvara. (Forseti hringir.) Þannig að það safnast saman og ég reikna með að sýslumaðurinn fyrrverandi, lögreglustjórinn og lögregluforinginn, muni fjalla nánar um þetta mál og lýsa því hvernig þessari leit vindur fram.