ákvörðun sameiginlegu EES-nefndarinnar, nr. 93/2017, um breytingu á IV. viðauka (Orka) við EES-samninginn.
Herra forseti. Ég þakka hv. þingmanni og þakka honum fyrir að minnast á mikilvægi landbúnaðarins, og sérstaklega garðyrkjunnar, í þessu sambandi. Það er kannski einn fjölmiðill sem hefur bent á hætturnar sem fylgja því að innleiða orkupakka þrjú hvað varðar landbúnaðinn og garðyrkjuna og það er Bændablaðið. Þar hefur verið vönduð umfjöllun um þetta mál. En það verður að segjast eins og er að það er mjög einkennilegt, svo að ég haldi mig við fjölmiðlana, að Ríkisútvarpið og fleiri fjölmiðlar skuli ekki hafa fjallað meira um landbúnaðinn í þessu sambandi. Hann skiptir okkur öll alveg gríðarlegu máli. Það eru mikil tækifæri í landbúnaði en þau gætu öll farið forgörðum eins og í garðyrkjunni ef raforkuverð færi upp úr öllu valdi, sem myndi gera það að verkum að garðyrkjan myndi jafnvel leggjast af eða verða ekki svipur hjá sjón miðað við það sem hún er í dag.
Þetta eru verulegar hættur. Við sjáum að þetta gerðist með orkupakka eitt og tvö. Þá hækkaði raforkuverðið og það er fyrirsjáanlegt að það muni hækka með orkupakka þrjú þrátt fyrir að sæstrengur verði ekki lagður. Það á að hækka eftirlitsgjaldið á raforkuframleiðendur um 45%. Það mun þýða hækkun, fara beint út í verðlagið. Þessir aðilar hafa sagt það sjálfir í umsögnum til utanríkismálanefndar að þetta muni fara beint út í verðlagið. Síðan er önnur tilskipun sem er nr. 72/2009, sem er inni í þessum orkupakka. Þar er kveðið á um það að þegar að því kemur að leggja tengimannvirki að vindorkuverunum o.s.frv. — því fylgir gríðarlegur kostnaður — muni sá kostnaður (Forseti hringir.) ekki leggjast á vindorkuframleiðandann heldur á (Forseti hringir.) fyrirtækið sem leggur tengivirkin. Það er í eigu almennings og kostnaðurinn mun náttúrlega fara út í verðlagið. (Forseti hringir.) Verðlagið mun því hækka, það er nokkuð ljóst.
