ákvörðun sameiginlegu EES-nefndarinnar, nr. 93/2017, um breytingu á IV. viðauka (Orka) við EES-samninginn.

Herra forseti. Hv. þingmaður, sem ég þakka fyrir spurninguna, kom inn á ansi áhugaverða þætti í máli sínu. Svar mitt er já. Það eru vísbendingar í svari hæstv. ráðherra um að verðið á þessum upprunaábyrgðum fari hækkandi. Bara til áréttingar þá segir í svarinu að árlegar tekjur vegna sölu Orku náttúrunnar á upprunaábyrgðum hafa verið 20–60 milljónir — árlegar tekjur.

Á þessu ári, 2019, gerir tekjuáætlun ráð fyrir sölu að verðmæti 150 millj. kr. Þannig að þarna er um margföldun að ræða. Það bendir því allt til þess að verðið fari hækkandi. Það er ekkert óeðlilegt í ljósi mikillar áherslu Evrópusambandsins á endurnýjanlegri orku og aukinni notkun á henni. Hv. þingmaður kallar þetta aflátsbréf. Já, þetta eru nokkurs konar aflátsbréf.

Það er krafa neytenda í þróuðum löndum, sérstaklega í nokkrum löndum Evrópu, að allt eigi að vera umhverfisvænt, eins og lífrænt grænmeti o.s.frv. Þeir versli ekki með eitthvað sem er mengandi eða reyni a.m.k. að forðast það og velji á milli, jafnvel þótt þeir þurfi að borga hærra verð fyrir það. Það sama líklega á við um raforkuna, orkuna sem fólkið notar og kaupir, að þannig verði það í framtíðinni.

Ég ætla að lesa þetta aftur upp með leyfi forseta. Mér láðist að fá leyfi forseta áðan og biðst afsökunar á því. Ég er nú búinn með tíma minn og læt það bíða næstu ræðu.