ákvörðun sameiginlegu EES-nefndarinnar, nr. 93/2017, um breytingu á IV. viðauka (Orka) við EES-samninginn.

Hæstv. forseti. Ég þakka þingmanninum fyrir þetta svar. Mig langar að árétta hina spurninguna sem ég var með um EES-samninginn, að hann gæti hugsanlega komist í uppnám ef við samþykktum orkupakkann.

Í svari þingmannsins kom fram að partur af þessum meintu rangfærslum var í sambandi við fyrirvarana, sem mikil þoka hefur verið yfir. Kannski hafa þeir ekki verið svo lögbundnir. Að sjálfsögðu hefur það líka komið fram að þeir eru einhliða og til heimabrúks og engir slíkir fyrirvarar halda. Það hefur sýnt sig. Það sýndi sig í hráakjötsmálinu. Þegar fyrirvari er gerður við samning þurfa báðir aðilar að vera sammála um að þessir fyrirvarar séu í samningnum, sem er ekki raunin í þessu máli.

Talandi um innleiðingar þá datt mér líka í hug að í fyrra kom til umræðu innleiðing sem varð að lögum árið 2015 um námskeið atvinnubílstjóra til að viðhalda atvinnuskírteini sínu. Það var EES-innleiðing. Ég man að ég spurði ráðherra um það. Hún átti aldrei við um Ísland vegna þess að Ísland er ekki tengt öðrum löndum með landamærum. Þetta átti bara við um lönd sem voru tengd með landamærum. (Forseti hringir.) Þarna kom innleiðing sem átti ekki við um Ísland en það kom enginn með andmæli við því. Mér datt þetta bara í hug hér í restina á ræðutíma mínum.

(Forseti hringir.) En mig langar að spyrja um þennan EES-samning, hvernig hann getur komist í uppnám ef við samþykkjum þriðja orkupakkann.