ákvörðun sameiginlegu EES-nefndarinnar, nr. 93/2017, um breytingu á IV. viðauka (Orka) við EES-samninginn.
Virðulegur forseti. Ég þakka hv. þm. Þorsteini Sæmundssyni fyrir ræðu hans. Mig langar til að spyrja þingmanninn sem var á þingi kjörtímabilið 2013–2016, á því tímabili þar sem óhætt er að segja að ýmislegt hafi gengið á í íslenskum stjórnmálum: Þekkir þingmaðurinn mörg dæmi þess að jafn hart hafi verið sótt að þeim sem höfðu kjark til að stíga fram og lýsa öndverðri skoðun við ríkisstjórnarflokkana og í þessu máli? Þá er ég að meina einstaklinga sem væru skilgreindir í innri kjörnum flokksstarfs hvers flokks.
Ég upplifi það þannig, sem betur fer, að hinir almennu flokksmenn njóti ágætisfrelsis enda tjá þeir okkur það daginn út og daginn inn sem stöndum í þessum slag, en ég hef veitt því athygli að veist er ansi harkalega að þeim sem stíga út af línunni séu þeir staddir þar í flokksstarfi hvers flokks fyrir sig að eftirtekt veki og óþægindi fyrir forystuna sem nú óskar þess heitast að þetta mál klárist og ekki þurfi að huga að því aftur.
