rafræn auðkenning og traustþjónusta fyrir rafræn viðskipti.

Herra forseti. Ég þakka hv. þingmanni fyrir upplýsandi tölu um þetta mál. Það er ágætt að heyra það sem hann er að segja í flóknum málum, að menn taki sig einmitt til og útskýri frumvörp sem eru til umræðu í ljósi þess að það sem við segjum úr þessum stól getur verið og er hluti af lögskýringargögnum þegar koma einmitt upp einhvers konar deilur. Ég held að það gleymist stundum, herra forseti, hvað það skiptir máli að við vöndum það sem við segjum hér og tökum einmitt þátt í að leggja línurnar, útskýra eða túlka vilja löggjafans, því að allir sem hingað koma eru að sjálfsögðu hluti af löggjafanum og það skiptir máli hvað hér er sagt.

Varðandi þetta mál, sem er áhugavert, langar mig að spyrja hv. þingmann um neytendavernd almennt á netinu. Ég held að neytendamál þurfi almennt að fá meiri og dýpri umræðu á Íslandi en raun ber vitni. Mér finnst þetta oft vera jaðarmálaflokkur sem ætti þó alls ekki að vera. Neytendamál hríslast í gegnum allt stjórnkerfið og viðskiptalífið. Hagsmunir neytenda eru svo breiðir að þeir geta oft gleymst í kapphlaupi sérhagsmuna og sérhagsmunahópa hér á landi, þannig að því meira sem við hugum að neytendamálum, því betra.

Að sama skapi mætti segja það sama um samkeppnismálin. Ég man að hæstiréttur Bandaríkjanna sagði á sínum tíma að samkeppnislög væru stjórnarskrá atvinnulífsins. Það sýnir svolítið hugsunina, hvað það skiptir miklu máli að hafa öfluga neytendalöggjöf annars vegar og öfluga samkeppnislöggjöf hins vegar. Samhliða þessari löggjöf þurfa eftirlitsstofnanirnar að vera í stakk búnar að sinna hlutverkum sínum.

Nú sé ég að tími minn er að renna út í þessu andsvari. Mig langar aðeins að fá vangaveltur þingmannsins almennt um neytendavernd á netinu, á viðskiptum á internetinu, hvernig hann sér það fyrir sér núna og finna hvar skórinn kreppir þegar kemur að neytendavernd (Forseti hringir.) vegna viðskipta yfir landamæri í gegnum internetið.