svör við fyrirspurnum.

Herra forseti. Lungann af þessu kjörtímabili, það sem af er, hef ég beðið frétta af fyrirspurn sem ég sendi fyrst hæstv. félagsmálaráðherra og síðan hæstv. dómsmálaráðherra. Nú er þingi að verða lokið og ætti að vera lokið en ekkert bólar á svari. Ég verð að leita enn einu sinni ásjár forseta vegna þess að ríkisstjórnin er stofnuð um það að styrkja störf Alþingis og biðja um að þeirri fyrirspurn verði svarað áður en þingi lýkur.

Í annan stað bíð ég líka eftir svari við fyrirspurn til fjármálaráðherra um undanskot í skattkerfinu en ég tel að ef svar bærist gæti það verið þokkalegt fóður inn í umræðu um stagbætta og þó götótta fjármálaáætlun ríkisstjórnarinnar. Þess vegna bið ég nú forseta um það enn einu sinni að veita mér, sem hluta af þessu þingi sem á að styrkja, liðsinni til að þeim fyrirspurnum verði svarað tafarlaust.