störf þingsins.

Herra forseti. Mig langar að vekja athygli á fréttatilkynningu Hagstofu Íslands síðan í gær þar sem rætt er um eiginfjárstöðu íslenskra heimila þar sem unnið er úr skattframtölum fyrir árið 2018. Þar kemur m.a. fram að eiginfjárstaða einstaklinga hafi styrkst frá fyrra ári um 15,6% og hjóna án barna um 13,8%. Þá styrktist eiginfjárstaða hjóna með börn um 19% og eiginfjárstaða einstæðra foreldra um 25% frá fyrra ári. Mest var styrkingin á milli ára í aldurshópnum 25–29 ára, 43,9%, og fyrir aldurshópinn 30–34 ára var hún 33,6%.

Fjölskyldum með neikvætt eigið fé í húsnæði fækkaði líkt og undanfarin ár. Árið 2018 voru 3.275 fjölskyldur með neikvæða eiginfjárstöðu í fasteign, um 26% færri en árið 2017. Eiginfjárstaða þeirra í fasteign var að meðaltali neikvæð um 6,6 millj. kr. árið 2018 sem er aukning frá fyrra ári um 1,2 millj. kr. Til samanburðar hækkaði heildarfasteignamat á landinu öllu um 14,8% milli áranna 2017 og 2018. Eigið fé fjölskyldna árið 2018 var alls 4.744 milljarðar kr. og jókst um 15,6% á milli ára sem er minni hækkun en árið 2017 þegar eigið fé jókst um tæp 23% milli ára.

Þegar þessi skuldastaða er skoðuð kemur í ljós að hún er betri en hjá nokkurri annarri Norðurlandaþjóð. Það er vert að vekja athygli á því hversu hröð þróunin hefur verið á undanförnum árum. Ég er fullviss um að þær breytingar sem urðu þegar boðið var upp á að hægt væri að nýta hluta af séreignarsparnaði til að greiða af íbúðalánum hafi verið stórt og jákvætt skref í þessari þróun. Styrk efnahagsstjórn og lækkandi vextir hafa einnig verið stór þáttur í þeirri jákvæðu þróun sem við sjáum í tölum Hagstofunnar síðustu ár.