breyting á ýmsum lögum vegna fjárlaga 2020.

Frú forseti. Ég þakka hv. þingmanni andsvarið. Sem betur fer held ég að langflestir þingmenn séu þegar allt kemur til alls sammála þeirri stefnu að það þurfi að gera vel í málefnum eldra fólks. Það er líka akkúrat það sem hæstv. heilbrigðisráðherra er að vinna að sem kemur m.a. fram í stefnu um málefni einstaklinga með heilabilun sem birtist á vef heilbrigðisráðuneytisins 24. júní sl.

Ég get engan veginn tekið undir það að lítið sé að gert. Það er ráðgert að á næsta ári, strax í febrúar, muni opna 100 ný hjúkrunarrými á höfuðborgarsvæðinu. Í febrúar á þessu ári var opnað 40 rýma hjúkrunarheimili úti á Seltjarnarnesi. Fyrr í þessum mánuði var tekin skóflustunga að heimili með 60 nýjum rýmum fyrir austan fjall. Þannig mætti lengi telja. Hins vegar hef ég margoft komið inn á það í ræðum mínum að ef við höldum okkur við sama þjónustufyrirkomulag í málefnum eldra fólks, þ.e. að halda alltaf áfram að bæta við hjúkrunarrýmum eftir því sem öldruðum fjölgar í stað þess að taka ákvörðun um að reyna að stemma stigu við þörfinni, eins og hæstv. ráðherra er að gera með heilsueflandi móttökum og eflingu heimahjúkrunar, verðum við á endanum komin í fyrirkomulag þar sem við verðum með í kringum 8.000 hjúkrunarrými fyrir árið 2050. Ég held að hvorki hv. þingmaður (Forseti hringir.) né aðrir sjái það sem einhverja draumsýn í málefnum eldra fólks.