staða, stjórn og starfshættir þjóðkirkjunnar o.fl.

Virðulegi forseti. Þessi meiri hluti er áhugaverður. Og það er áhugavert að það er minni hluti í nýskráningum í þjóðkirkjuna í dag. Mjög nýlega hefur það einmitt verið að gerast að minni hluti þeirra sem fæðast er skráður í þjóðkirkjuna. Þarna fjarar hratt undan.

Ég er til í að leiðbeina hv. þingmanni um óskýrleika þessarar þjóðaratkvæðagreiðsluspurningar um þjóðkirkju á Íslandi. Tvö dæmi um stjórnarskrárákvæði sem myndu uppfylla skilyrði spurningarinnar væru: Ásatrúarfélagið er þjóðkirkjan á Íslandi. Í öðru lagi: Það er engin þjóðkirkja á Íslandi. Ef annað tveggja væri í stjórnarskrá myndi það uppfylla kröfu um ákvæði um þjóðkirkju í stjórnarskránni. Þetta er mjög óskýr spurning þegar allt kemur til alls.

Mig langar líka til að spyrja hv. þingmann um sundurliðun verkefna í þessu viðbótarsamkomulagi sem er fjallað um, um kirkjujarðasamkomulagið almennt. Miðað við ræðu hv. þingmanns virtist hann a.m.k. ýja að því að það væri eðlilegt að hafa sundurliðun á verkefnum kirkjunnar, þá á því hvaða hluti sé til greiðslu vegna eignatilfærslunnar og hvaða hluti vegna 62. gr. stjórnarskrárinnar. Las ég rétt í ræðu hv. þingmanns hvað það varðar?

Og að lokum um stjórnarskrárákvæðið um kirkjuskipun spyr ég: Þýðir það ekki að þær breytingar sem við erum að gera í þessum lögum verða að fara í þjóðaratkvæðagreiðslu?