breyting á ýmsum lögum á sviði matvæla.
Virðulegi forseti. Ég flyt nefndarálit um frumvarp til laga um breytingu á ýmsum lögum á sviði matvæla (einföldun regluverks, Matvælasjóður og EES-reglur). Nefndin fékk fjölda gesta á sinn fund og ég ætla bara að stikla á stóru yfir nefndarálitið. Það er auðvitað auðvelt að lesa sér til um niðurstöðuna. Nefndinni bárust umsagnir frá Bændasamtökum Íslands, Framleiðnisjóði landbúnaðarins, Heilbrigðiseftirliti Reykjavíkur, Landssamtökum sláturleyfishafa, Samtökum ferðaþjónustunnar, Samtökum fyrirtækja í sjávarútvegi og Samtökum iðnaðarins, svo minnst sé á það.
Megintilgangur frumvarpsins er sá að innleiða reglugerð Evrópuþingsins og ráðsins nr. 2017/625 ásamt því að einfalda og samræma regluverk varðandi matvæli og efla og styrkja verðmætasköpun við framleiðslu, vinnslu og markaðssetningu matvæla. Varðandi einföldun regluverks og innleiðingu Evrópureglugerðar var fyrir nefndinni lýst ánægju með áform um einföldun regluverks og eftirlits. Nefndinni var bent á að skilvirkast væri að sem mest eftirlit væri hjá sama eftirlitsaðilanum. Var nefndinni jafnframt bent á að grunneftirlitsþörf þyrfti að taka mið af tíðni eftirlits í stað fjölda stunda í eftirliti. Nefndinni var bent á að eftirlit með matvælum væri á höndum ellefu aðila um allt land. Það er eitt af því sem margir ræddu. Það var líka rætt um gjaldtöku og kostnað og fyrir nefndinni var lýst áhyggjum af nýju ákvæði um gjaldtöku. Nefndinni var bent á mikilvægi þess að gæta að gagnsæi við álagningu eftirlitsgjalds og að samráð yrði haft við hagsmunaaðila um almennar aðferðir sem notaðar verði við útreikning þóknana og gjalda. Meiri hlutinn leggur áherslu á að gjaldtaka fyrir eftirlit endurspegli raunverulegan kostnað við eftirlit og bendir jafnframt á að með áhættumiðuðu eftirliti verður tíðni eftirlits mest þar sem þess er mest þörf.
Einn megintilgangur þessa frumvarps var að stofna Matvælasjóð. Í c-lið 15. gr. frumvarpsins er lagt til að Matvælasjóður verði stofnaður, sem hafi það hlutverk að styrkja þróun og nýsköpun við framleiðslu og vinnslu matvæla úr landbúnaði og sjávarútvegi. Í honum verði Framleiðnisjóður landbúnaðarins og AVS-rannsóknasjóður í sjávarútvegi sameinaðir og lög um Framleiðnisjóð landbúnaðarins, nr. 89/1966, felld brott. En með framhaldsnefndaráliti með breytingartillögu sem ég les hér á eftir hefur þessum lið verið tímabundið slegið á frest.
Í nefndarálitinu er líka fjallað um heimaslátrun og þar komu ýmis sjónarmið fram fyrir nefndinni. Það komu fram ábendingar um þau tækifæri í ferðaþjónustu sem fælust í að auka heimaslátrun. Var nefndinni bent á að heimilt væri að veiða lax og silung í vötnum og ám í héraði og verka fiskinn í viðurkenndum eldhúsum veitingastaða eða hótela landsbyggðarinnar sem er ekki leyfilegt varðandi heimaslátrað kjöt. Nefndinni var bent á að mikil samlegðaráhrif væru milli búreksturs og ferðaþjónustu og mikill áhugi væri á að geta boðið hótelgestum ferskt kjöt allt árið en þungt regluverk komi í veg fyrir að það sé mögulegt. Fyrir nefndinni komu fram sjónarmið um að heimaslátrun og sauðfé allt árið gæti valdið byltingu í framboð á fersku kjöti og afkomu sauðfjárbænda. Meiri hlutinn tekur undir að skoða þurfi regluverk um örsláturhús og heimaslátrun með tilliti til þess hvort unnt sé að auka svigrúm að einhverju leyti.
Ýmsar aðrar lagabreytingar koma hér fram og er þeirra rækilega getið í þessu ágæta nefndarálitsins sem ég ætla annars svo sem ekkert að fara neitt frekar yfir hér, tímans vegna.
María Hjálmarsdóttir var fjarverandi við afgreiðslu nefndarálitsins en undir þetta nefndarálit skrifuðu, auk mín sem framsögumanns, Lilja Rafney Magnúsdóttir formaður, Halla Signý Kristjánsdóttir, Njáll Trausti Friðbertsson og Una Hildardóttir.
Síðan er hér, virðulegur forseti, framhaldsnefndarálit með breytingartillögu um frumvarp til laga um breytingu á ýmsum lögum á sviði matvæla (einföldun regluverks, Matvælasjóður og EES-reglur) frá meiri hluta atvinnuveganefndar og ég ætla að lesa það örstutta nefndarálit sem hljóðar svo:
„Nefndin hefur fjallað frekar um málið. Meiri hlutinn bendir á að í 10. tölulið þingsályktunar um aðgerðaáætlun um matvælaöryggi og vernd búfjárstofna, nr. 40/149, var ríkisstjórninni falið að setja á fót sjóð með áherslu á eflingu nýsköpunar í innlendri matvælaframleiðslu og var tillaga um stofnun Matvælasjóðs liður í þeirri vinnu.
Í ljósi þeirra athugasemda sem gerðar voru við niðurfellingu Framleiðnisjóðs landbúnaðarins leggur meiri hlutinn til að þau ákvæði frumvarpsins sem mæla fyrir um stofnun Matvælasjóðs og brottfall laga um Framleiðnisjóð landbúnaðarins falli brott. Leggur meiri hlutinn þó áherslu á að áfram verði unnið að undirbúningi stofnunar Matvælasjóðs í samræmi við það sem kveðið er á um í framangreindri þingsályktun.“
Meiri hlutinn leggur til að frumvarpið verði samþykkt með þeim breytingum sem rakin eru í þessu plaggi.
Undir þetta nefndarálit rita Lilja Rafney Magnúsdóttir, formaður og framsögumaður, Halla Signý Kristjánsdóttir, Haraldur Benediktsson, Njáll Trausti Friðbertsson, Steinunn Þóra Árnadóttir og Þorgrímur Sigmundsson. Sá er hér stendur hefði gjarnan viljað vera á þessu nefndaráliti en var því miður fjarverandi síðasta fund af persónulegum ástæðum, en ég legg þetta hér með fram.
