staðan í stjórnmálunum í byrjun árs og verkefnin fram undan.

Virðulegur forseti. Við fáum meira af málefnalegum spurningum frá hv. þingmanni og fullyrðingum. Ég er ekki að láta skattgreiðendur gera eitt eða neitt. Ég hef stutt hvern heilbrigðisráðherrann á fætur öðrum í ýmiss konar átaksverkefnum, m.a. ætla ég að vísa til þess að fyrir nokkrum árum létum við opna Vífilsstaðaspítala að nýju til að létta á Landspítalanum svo að hann yrði ekki stíflaður vegna mikils þrýstings á bráðamóttökunni. En þrátt fyrir ýmiss konar átaksverkefni lendir bráðadeildin ítrekað í vanda. Sá málaflokkur, virðulegi þingmaður, er hjá fagráðherra. Það er ágætt hjá hv. þingmanni að taka þessa umræðu upp við hæstv. heilbrigðisráðherra. Ég bendi hins vegar á að ég hef verið talsmaður blandaðra lausna í íslenskri heilbrigðisþjónustu. Ég hef talað fyrir því að við ættum að berjast gegn hvers kyns sóun í kerfinu, að við ættum að nýta sveigjanleika einkaframtaksins en fleiri raddir í þingsal hafa talað (Forseti hringir.) gegn einkaframtakinu, jafnvel þegar augljóst er á öllum tölum að það gæti leitt til sparnaðar fyrir skattgreiðendur sem hv. þingmaður er skyndilega orðinn talsmaður fyrir. Það er eitthvað nýtt frá Samfylkingunni.