útlendingastefna.

Virðulegi forseti. Ég vil kannski byrja á að klára að svara því sem kom fram í máli hv. þingmanns í síðari fyrirspurn um það að ég sé eyland í mínum flokki. Ég hef aldrei heyrt aðra eins vitleysu. Það var hæstv. dómsmálaráðherra, og þá um leið innanríkisráðherra, Hanna Birna Kristjánsdóttir sem leiddi þá vinnu að skipa hér þverpólitíska þingmannanefnd. Það var hæstv. ráðherra, sem þá var, Ólöf Nordal sem tók við því og kláraði þau lög sem við vinnum eftir í dag. Það var mikilvægt skref í málefnum útlendinga og ég sé ekki betur en að það hafi verið skýr stefna Sjálfstæðisflokksins og ráðherra hans að koma þessum málum þannig fyrir að þau séu rædd af yfirvegun og í þeim tilgangi að ná öllum saman í þessum viðkvæma málaflokki. Þessi málaflokkur snýst um líf fólks og hann þarf alltaf að taka stöðugum breytingum eftir því sem heimurinn breytist. Við verðum að vinna saman af því að það er óábyrgt að ætla að ræða þessi mál hvert í sínu horninu. Þá náum við litlum sem engum árangri í þessum málaflokki. Þingmannanefndin gefur mér ráðgefandi tillögur. Ég vona að samhugur sé um þær tillögur sem koma frá henni enda á þetta að vera þverpólitísk nefnd. Hún á að ræða málefnin, og þær breytingar sem við getum gert, ítarlega.