staða efnahagsmála og viðbrögð ríkisstjórnarinnar við kólnun hagkerfisins.

Virðulegi forseti. Það er áhugavert þegar forystufólk í ríkisstjórninni ræðir tillögur í efnahagsmálum í gegnum Morgunblaðið þegar ekki næst niðurstaða við ríkisstjórnarborðið. Hæstv. mennta- og menningarmálaráðherra á þakkir skildar fyrir að hafa gert einmitt það í síðustu viku og hreyft við þessari mikilvægu umræðu um innviðauppbyggingu sem mótvægisaðgerð við fyrirsjáanlegri niðursveiflu. Slaki í efnahagslífinu er kjöraðstæður fyrir opinberar fjárfestingar. Frekar en að líta á umdeilda bankasölu sem leið að fjármagni og tefja framkvæmdir þar með, mögulega í nokkur ár, er upplagt að grípa þegar í stað til uppbyggingar þegar lánsfé býðst ríkinu á mjög hagstæðum kjörum.

Innviðauppbyggingu þarf að skoða í stærra samhengi en að steypa hér og þar. Það væri sennilega til of mikils mælst að ríkisstjórnin gerði grænan samfélagssáttmála tveggja stjórnarandstöðuflokka að sínum en þar er stærsta tækifærið í stöðunni, þ.e. að byggja áætlun um innviðafjárfestingar á grænum forsendum. Hvernig gæti slík áætlun litið út? Tökum fjögur dæmi. Aukin áhersla á almenningssamgöngur, með því að flýta t.d. borgarlínunni, arðbær fjárfesting. Meiri fjárfesting í menntakerfinu, mjög arðbær fjárfesting líka. En þá þarf að gæta þess að stíga ekki á sama tíma skref aftur á bak eins og með því að hækka skráningargjöld í háskóla um 40%, eins og talað er um í fjölmiðlum í dag. Svo má nefna stórauknar rannsóknir á öllum sviðum og nægir að nefna 14% árangurshlutfall umsókna í Rannsóknasjóð til að sýna hve brýn þörfin er og einnig má nefna lok þess eilífðarverkefnis að tryggja raforkuöryggi og gagnatengingar til að allt flinka fólkið sem við erum búin að mennta í góða menntakerfinu okkar og styrkja með rannsóknasjóðunum okkar geti skotið rótum um allt land (Forseti hringir.) til að skapa sér og nýta tækifæri sem þar búa.