störf þingsins.

Virðulegur forseti. Á þessum tímum erum við í aðstæðum sem við þekkjum eiginlega ekki. Þetta eru aðstæður sem við verðum þó að takast á við og þess vegna erum við komin í þá stöðu nú að við getum ekki talað um mig og þig, ég og þú, heldur erum við öll í þessum aðstæðum. Við verðum að taka höndum saman og sérstaklega eins og staðan er í dag gagnvart þeim sem minnst mega sín í þessu samfélagi, fólki með undirliggjandi sjúkdóma, þeim sem verst hafa haft það vegna fátæktar í okkar samfélagi.

Mæðrastyrksnefnd hefur opnað aftur og Fjölskylduhjálp Íslands er byrjuð að dreifa matarbökkum. Það er verið að hjálpa og það er verið að gera góða hluti, en meira þarf til. Það þarf líka að hjálpa fólki úti á landsbyggðinni því að þar er stór hópur sem einnig þarf hjálpar við. Við þurfum að passa upp á að óttinn grípi ekki öll völd af okkur. Geðhjálp hefur opnað síma til að aðstoða og við verðum líka að passa upp á að fara ekki offari í því að einangra og skilja að. Því miður hefur komið upp sú staða að í allri okkar einangrun, þar sem við erum að reyna að vernda okkar eldri borgara, að við erum að aðskilja hjón sem er ekki gott. Það getur valdið bæði kvíða og meiri erfiðleikum þannig að við verðum að hugsa aðeins um þá sem minnst hafa. Þess vegna ber okkur skylda til að taka höndum saman. Við sýndum það í velferðarnefnd og við getum sýnt það á þingi að þetta er ekki stjórnarandstaðan eða stjórnin, þetta erum við öll sem þurfum að taka á þessu. Núna er það það sem við þurfum að gera, standa saman og sjá til þess að við tökum á þessu og leysum þetta.