frekari aðgerðir til að mæta efnahagslegum áhrifum í kjölfar heimsfaraldurs kórónuveiru.

Virðulegur forseti. Ég þakka hæstv. fjármálaráðherra framsöguna. Það eru tvö atriði sem ég ætla að fá að koma inn á. Ég tek fyrra andsvarið í að ræða það sem snýr að fjölmiðlum. Í fyrsta lagi blasir það við öllum að fjölmiðlar eru í verulega snúnari stöðu en áður var, m.a. vegna falls í auglýsingasölu og þar fram eftir götunum. Það er tvennt í þessu. Í fyrsta lagi: Sér hæstv. fjármálaráðherra ekki fyrir sér að margir minni fjölmiðlanna gætu nýtt sér svokallaða stuðningslánaleið sem er verið að mæla fyrir í dag? Er nokkuð annað í stöðunni en að smærri fjölmiðlar falli þar undir? Ég sé alla vega ekki í fljótu bragði að svo ætti ekki að vera en væri áhugavert að heyra skoðun ráðherrans á því.

Hitt atriðið sem mig langar til að koma inn á er það sem segir í 9. gr. frumvarpsins, þar sem fjallað er um breytingu á lögum um fjölmiðla, með leyfi forseta:

„Á árinu 2020 er ráðherra heimilt með reglugerð að útfæra fyrirkomulag á sérstökum rekstrarstuðningi til einkarekinna fjölmiðla.“

Er þetta ekki með því alopnasta sem boðið hefur verið upp á í frumvarpstexta hvað varðar frelsi ráðherra til að ráðstafa fjármunum eins og hér um ræðir? Þetta eru 350 milljónir til einkarekinna fjölmiðla. Sjálfum þykir mér blasa við að þetta þurfi að formfesta meira í lögunum og þar með í vinnu í nefndinni. Það er ekki að ástæðulausu sem fjölmiðlafrumvarpið hefur ekki verið klárað. Það er af því að verulegur ágreiningur er um mörg efnisatriði þess.

Það eru þessi tvö atriði sem mig langar að spyrja hæstv. ráðherra um. Í fyrsta lagi hvort hann sjái fyrir sér einhverja vankanta á því að lánin, að upphæð 6 milljónum, (Forseti hringir.) nýtist smærri fjölmiðlum og síðan hitt atriðið sem snýr að þessu, hvort ekki sé býsna bratt farið með svona opna heimild (Forseti hringir.) til ráðherra hvað reglugerðarsetninguna varðar.