störf þingsins.

Herra forseti. Nú bera fréttir með sér að bankar og lánastofnanir taki ekkert tillit til ástandsins í þjóðfélaginu. Þar eru innheimtuaðgerðir með óbreyttum hætti gagnvart skuldurum og heimilum landsins. Innheimtuaðgerðum er fram haldið af hörku og lánastofnanir halda áfram þar sem frá var horfið með aðfarargerðir og nauðungarsölur.

Aðgerðapakki lánastofnana er af allt öðrum toga. Hann felur í sér að ganga fram af óbreyttri eljusemi gagnvart skuldurum þessa lands þrátt fyrir að atvinnuleysi hafi aldrei mælst eins mikið og nú frá því að mælingar hófust og fjöldi fólks berjist í bökkum við að ná endum saman. Vísitala er byrjuð að hækka og mun hækka áfram því að gengi helstu gjaldmiðla hefur hækkað umtalsvert á síðustu þremur mánuðum. Dollari hefur hækkað um ríflega 21 kr., rúm 17%, og evran hefur hækkað um sömu krónutölu, rúmlega 15%. Mestöll þessi hækkun hefur orðið síðustu 60 daga og því eru áhrif á verðlag alls ekki komin fram að neinu marki innan lands. Þannig eru merki á lofti um að vísitalan muni fara enn frekar af stað á næstunni með óhjákvæmilegum afleiðingum til hækkunar á skuldum heimila í landinu. Miðflokkurinn hefur talað fyrir því að vísitala yrði fryst. Mér fyndist eðlilegt að stjórnvöld gerðu a.m.k. ráðstafanir til að unnt yrði að ráðast í slíka framkvæmd sem að sönnu þarfnast einhvers undirbúnings. Það má alls ekki endurtaka sig, herra forseti, sem gerðist hér eftir bankahrunið, að mesta höggið lenti með ógnarþunga á heimilum landsmanna. Það má ekki gerast aftur.