utanríkis- og alþjóðamál.
Ég ætla ekki að bæta neinu við varðandi jafnréttismálin, ég held að það sé ekki langt á milli okkar hv. þingmanns, ef eitthvað, þegar við ræðum þau mál. En hins vegar vildi ég vekja athygli á því sem kemur fram um loftslagsmálin og umhverfismálin, það er á bls. 42–45 í skýrslunni. Ég tel okkur líka að hafa skyldum að gegna varðandi ákveðin málefni. Ef ég man rétt eru 70% af heiminum hafið, en það eru ekkert voðalega margir sem eru mikið að hugsa um það, alla vega ekki á alþjóðavettvangi. Við höfum litið á það þannig að það sé okkar hlutverk að vera í forystu alltaf þegar kemur að málefnum hafsins. Í formennskunni í norðurskautsráðinu sem hefur gengið vel, og hv. þm. Ari Trausti Guðmundsson fór ágætlega yfir það, hafa áherslur verið á málefni hafsins, loftslagsmál og endurnýjanlega orku og fólk og samfélög á norðurslóðum, bara svona sem eitt dæmi. En þetta á auðvitað við alls staðar. Þegar kemur að þróunarsamvinnunni er engin tilviljun að GRÓ-skólarnir eru m.a. jafnréttisskóli og sömuleiðis jarðvarmaskóli. Reyndar er það þannig líka þegar kemur að sjávarútvegsmálum að þar höfum við umhverfisskilaboð sem við erum að deila með öðrum. Menn geta haft allar skoðanir á veiðileyfagjöldum og öllu milli himins og jarðar en það eru mjög litlar deilur ef nokkrar á Íslandi um það að sú leið sem við höfum farið að stunda sjálfbærar fiskveiðar, sem hefur fengið viðurkenningu alls staðar, sem við viljum, held ég að ég geti fullyrt, er leiðin sem við viljum fara. Því miður er hún ekki farin, svo að dæmi sé tekið. Loftslagsmálin tengjast auðvitað jarðarmálum og því að nýta endurnýjanlega orku náttúrlega órjúfanlega. Eitt er hvað menn eiga að kalla þetta en í framkvæmdinni leggjum við alls staðar áherslu á jafnréttismálin og sömuleiðis (Forseti hringir.) grænu málin, ef þannig má að orði komast. Framsóknarmenn verða nú ánægðir með að heyra þetta.