störf þingsins.

Virðulegi forseti. Í Morgunblaðinu í dag má lesa frétt sem gerir mig verulega hugsi. Þar kemur fram að stærsta bókaverslanakeðja landsins, Penninn Eymundsson, hefur tekið allar nýjar bækur bókaútgáfunnar Uglu úr sölu og endursent þær útgáfunni. Þetta gerist orðalaust og án nokkurra viðvarana. Jakob Ásgeirsson, útgefandi og eigandi Uglu, segir að Eymundsson geri þetta til að refsa sér fyrir að hafa látið lesa bækur sínar inn sem hljóðbækur og streymt þeim til hlustunar á netinu. Slíkt hafa margar útgáfur gert, virðulegi forseti, að undanförnu. Mikil og vaxandi eftirspurn virðist eftir slíku hjá neytendum og fólk hlustar á hljóðbækur, og er ég náttúrlega í þeim hópi, enda með mjög skerta sjón, en fram kemur í sömu Morgunblaðsfrétt að forstjóri Eymundsson hafni þessari skýringu. En eitt um það.

Það er mjög alvarlegt ef markaðsráðandi fyrirtæki í miðlun prentmáls eigi að geta haft sína hentisemi um það hvaða bækur það bjóði til sölu. Bókaútgáfa er mjög mikilvægur hluti af stjórnarskrárvörðu tjáningarfrelsi í þessu landi auk þess sem bækur sinna miklu hlutverki í menningu og þjóðmálaumræðu. Fyrirtæki sem fá að njóta markaðsráðandi stöðu eiga að hafa samfélagslegar skyldur. Svona gera menn ekki, að ráðast á litla útgáfu sem hefur staðið sig mjög vel og m.a. gefið út margar perlur heimsbókmenntanna á undanförnum árum. Fyrir utan þetta er það ótækt, ef rétt reynist, að fákeppnirisi á markaði reyni með svona hætti að stýra aðgengi neytenda að tilteknum vörutegundum, í þessu tilfelli að hljóðbókum í streymi á netinu.

Við sem löggjafinn hér á hinu háa Alþingi eigum að fylgjast grannt með þessu máli.