Orkusjóður.

Herra forseti. Ég þakka hv. þingmanni fyrir þetta. Það er einmitt það sem við þurfum að gera milli 2. og 3. umr., fara aðeins betur í gegnum umsagnir Samtaka iðnaðarins og Landsvirkjunar. Þetta er ótrúlega merkilegur sjóður með 50 ára sögu sem hefur átt stóran þátt í orkuskiptum á Íslandi og jarðhitavæðingu og við þurfum að fara aðeins betur í gegnum þá þætti sem snúa að því tvennu. Ég tek bara, eins og ég sagði í fyrra svari, undir þau sjónarmið sem hv. þingmaður kemur inn á og ég vona að við náum að afgreiða málið í nefndinni hratt og vel með tilliti til þeirra athugasemda.