fimm ára samgönguáætlun 2020-2024.

Hæstv. forseti. Ég ætla að halda áfram þar sem frá var horfið í síðustu ræðu en þar var ég einmitt að tala um Sundabraut og borgarlínu. Það á að byrja á að troða borgarlínu niður á svæði þar sem ekkert pláss er fyrir hana, sé ætlunin að önnur umferð eigi sinn sjálfsagða tilverurétt. Í úthverfum er víða hægt að koma borgarlínu við en hér miðsvæðis gæti þurft að grípa til aðgerða eins og að leggja Miklubraut í stokk. Tíminn sem fer í það hefur ekki verið reiknaður út, þaðan af síður hvaða óværa gýs upp þegar byrjað verður að grafa á því svæði. Sennilega mun fjölga í starfsstétt meindýraeyða enda Hlíðar og Þingholtin alþekkt svæði þar sem rottur er í holræsum.

Á framkvæmdatímanum, þar sem unnið verður við þröngar aðstæður, mun tilvera þúsunda manna sem búa á svæðinu breytast. Framkvæmdinni fylgir ónæði, umferð vinnutækja og mengun. Þetta hefur mikil áhrif á heilsu og lífsgæði þeirra sem miðsvæðis búa. Reykjavík er á norðurhjara, nánar tiltekið á 64°. Það er útópía að setja niður borgarlínu því að hún á ekki við hér. Íslenskir vetur hafa undanfarið verið bærilegir í höfuðborginni en það geta komið slæm ár.

En aðeins að nágrannasveitarfélögum Reykjavíkur. Þau hafa lýst yfir stuðningi við borgarlínu. Sú framkvæmd verður sjálfsagt flókin í Kópavogi. Allir þekkja jú skipulag gatna þar. Þeir hljóta að koma með eitthvert stórkostlegt útspil um útfærsluna. Garðabær er eðlilega fylgjandi og línan mun fara þar í gegn án teljandi áhrifa á bæinn. Þeir munu því njóta mikils ávinnings ef svo ólíklega vill til að af þessu verði. Það má því segja að mesta íhaldsbæli landsins og helsta vígi Sjálfstæðisflokksins hagnist mikið á að fá þennan legg í gegnum bæinn en aðrir landsmenn borga að sjálfsögðu fyrir. En hvað um Hafnarfjörð? Það er öllum ljóst að umferð þar er allt of mikil. Það er eitthvað sem þarf að leysa en lausnin er ekki borgarlína. Þar þarf að stýra ljósum betur, hugsanlega tvöfalda vegi, enda er stór hluti umferðar í gegnum Hafnarfjörð bílar frá Suðurnesjum. Mosfellsbær er sérstakt tilfelli. Hugmyndir eru um að borgarlína liggi í gegnum Blikastaðaland, það land er 90 hektarar og er í eigu félags sem heitir Landey en Landey er í eigu Stefnis sem er einn af sjóðum Arion banka.

Það má því segja að Arion banki hafi mikla hagsmuni af borgarlínu. Landið er hátt verðmetið í bókum félagsins og eru þeir hagsmunir þar að byggja þétt og mikið nálægt borgarlínu og auka þannig virði landsins. Það er hægt á meðan sveitarfélögin hér viðhalda skorti á húsnæði. Borgarlínuverkefnið er því komið með sterkan bandamann sem er Arion banki. Seltjarnarnes þarf að nefna líka. Þar er hins vegar góð leið með strætó sem virkar ágætlega.

Við eigum að sjálfsögðu að horfa til orkuskipta, tækni framtíðarinnar. Bílar í framtíðinni verða örugglega knúnir vistvænum orkugjöfum. Þeir munu verða tæknivæddir, kannski sjálfkeyrandi og umferðarstýringar munu batna. Covid-19 hefur breytt heimsmyndinni og um það deilir enginn nú. Þar sér fólk möguleika á að hægt sé að vinna að heiman frá sér sem þýðir færri ferðir. Mun þetta hafa áhrif á almenningssamgöngur? Vafalaust. Við erum á rangri braut af mörgum ástæðum. Á meðan ekkert liggur fyrir um endanlega útfærslu og kostnað er óábyrgt að fara í slíkt verkefni. Við verðum að taka inn afleiddan kostnað sem mun falla til, þ.e. kostnað eins og lífsgæðaskerðingu þeirra sem búa nálægt framkvæmdasvæðinu, kostnað skattborgara og fórnarkostnað við að bruðla í vitleysu í stað þess að verja fé skynsamlega.

Hæstv. forseti. Ég óska eftir því að vera settur áfram á mælendaskrá.