mannabreytingar í nefndum.
Forseta hafa borist bréf, dagsett 24. september sl., frá formanni þingflokks Vinstrihreyfingarinnar – grænu framboði um mannabreytingar í nefndum þingsins, samanber 16. gr. þingskapa:
Bjarkey Olsen Gunnarsdóttir afsalar sér sæti sem aðalmaður í allsherjar- og menntamálanefnd en tekur sæti sem aðalmaður í utanríkismálanefnd og atvinnuveganefnd í stað Rósu Bjarkar Brynjólfsdóttur.
Steinunn Þóra Árnadóttir tekur sæti sem varamaður í utanríkismálanefnd í stað Bjarkeyjar Olsen Gunnarsdóttur.
Ólafur Þór Gunnarsson tekur sæti sem varamaður í umhverfis- og samgöngunefnd í stað Rósu Bjarkar Brynjólfsdóttur.
Steinunn Þóra Árnadóttir tekur sæti sem varamaður í velferðarnefnd í stað Rósu Bjarkar Brynjólfsdóttur.
Þá mun Ólafur Þór Gunnarsson taka sæti sem aðalmaður í Íslandsdeild Evrópuráðsins í stað Rósu Bjarkar Brynjólfsdóttur og Bjarkey Olsen Gunnarsdóttur sem varamaður í þeirri nefnd þegar til þeirra breytinga kemur.
Þessar mannabreytingar skoðast samþykktar án atkvæðagreiðslu ef enginn hreyfir andmælum.
Forseta hefur borist bréf, dagsett í dag, frá formanni þingflokks Pírata um mannabreytingar í nefndum þingsins, samanber 16. gr. þingskapa:
Helgi Hrafn Gunnarsson mun taka sæti Þórhildar Sunnu Ævarsdóttur sem aðalmaður í atvinnuveganefnd.
Þórhildur Sunna Ævarsdóttir mun taka sæti sem aðalmaður í allsherjar- og menntamálanefnd í stað Helga Hrafns Gunnarssonar og Jón Þór Ólafsson verður varamaður í þeirri nefnd.
Þórhildur Sunna Ævarsdóttir verður varamaður í velferðarnefnd í stað Helga Hrafns Gunnarssonar.
Þessar mannabreytingar skoðast samþykktar án atkvæðagreiðslu ef enginn hreyfir andmælum.
Þá tilkynnti þingflokksformaður Pírata jafnframt að Smári McCarthy afsalar sér sæti sem aðalmaður í utanríkismálanefnd og er því laust sæti í þeirri nefnd.
Í 5. málslið 1. mgr. 14 gr. þingskapa segir að hver alþingismaður eigi rétt á sæti í a.m.k. einni þingnefnd samkvæmt 13. gr.
Forseti leggur því til að hv. þm. Rósa Björk Brynjólfsdóttir sitji áfram sem aðalmaður í utanríkismálanefnd en tildrög þessara breytinga eru úrsögn hennar úr þingflokki Vinstrihreyfingarinnar – græns framboðs.
Skoðast þetta samþykkt ef ekki er hreyft andmælum.
