fjármálaáætlun 2021--2025.

Virðulegur forseti. Ég þakka hv. þingmanni fyrir þessar vangaveltur. Áður en ég svara vangaveltum hans vil ég segja að ég er ótrúlega ánægður með þau skref sem ríkisstjórnin hefur stigið í fæðingarorlofinu á þessu kjörtímabili. Við erum búin að hækka greiðslur í fæðingarorlofi. Við erum búin að lengja fæðingarorlofið í 12 mánuði og í rauninni að endurreisa fæðingarorlofskerfið, vil ég meina. Enda sjáum við að það fjármagn sem renna mun til fæðingarorlofs, til barnafjölskyldna í landinu, nær tvöfaldast í tíð núverandi ríkisstjórnar, fer úr rétt um 10 milljörðum í um 20 milljarða, gróflega reiknað. Þannig að það er gríðarlegt ánægjuefni.

Nú er frumvarp í samráðsgátt sem lýtur að fæðingarorlofinu og kemur væntanlega inn í þingið í þessum mánuði eða í byrjun næsta mánaðar. Það sem hv. þingmaður veltir upp hér lýtur í rauninni að sveitarfélögunum í landinu. Við höfum átt samtöl við sveitarfélögin allt þetta kjörtímabil í gegnum heildarsamtök þeirra, Samband íslenskra sveitarfélaga. Í könnun sem þeir hafa gert kemur fram að meiri hluti sveitarfélaga býður upp á leikskólaþjónustu þar sem búið er að brúa bilið, en aðeins minni hluti barna býr við þá brú. Við getum lesið út úr þessu að það eru einkum litlu og meðalstóru sveitarfélögin sem hafa verið að brúa þetta bil, en stærri sveitarfélögin hafa ekki gert það.

Þá er spurt: Þegar meiri hluti sveitarfélaga í landinu er búinn að búa til þessa brú, er ekki rétt að við beitum þrýstingi gagnvart hinum hlutanum sem ekki er búinn að gera það, að gera slíkt hið sama? Við erum nefnilega með tvö stjórnsýslustig í þessu landi, annars vegar sveitarfélögin og hins vegar ríkið. Ríkið hefur fyrir sitt leyti stigið ótrúlega myndarleg skref á þessu kjörtímabili. Ég hef fundið fyrir því að mörg sveitarfélög hafa metnað til að gera slíkt hið sama og hef sagt að við þurfum einfaldlega að þrýsta á þau og hvetja þau til þess með öllum mögulegum ráðum að þau stigi það skref. En það er ekki á valdsviði ráðherranna að gera það, það er á hendi sveitarfélaganna.