fjármálaáætlun 2021--2025.

Hæstv. forseti. Ég átti eftir að koma aðeins inn á forgangsröðun aðgerða sem hv. þingmaður nefndi í fyrra andsvari. Hann talar réttilega um að í aðgerðaáætlun íslenskra stjórnvalda eru aðgerðir sem eru útfærðari heldur en aðrar. Þær eiga að skila um 35% árangri árið 2030, sem er meira en ætlast er til af okkur eins og staðan er í dag samkvæmt okkar alþjóðlegu skuldbindingum. Ég vil taka það skýrt fram. Síðan eru áætlanir sem eru í útfærslu og þær eiga að geta komið okkur upp í 40–46%, sem væri þá talsvert meira en okkar alþjóðlegu skuldbindingar í samfloti okkar með Evrópusambandinu og Noregi gera ráð fyrir.

Að mínu mati þurfum við að hafa forgangsröðunina þannig að ráðast í orkuskiptin vegna þess að það er það sem skiptir máli til lengri tíma litið, að umbylta þessum kerfum okkar. Við erum farin að sjá mjög jákvæðar vísbendingar um að þetta sé að fara að gerast núna hraðar og hraðar. Bráðabirgðatölur sem komið hafa frá Umhverfisstofnun sýna einfaldlega samdrátt í vegasamgöngum. Við erum að sjá tölur birtast núna um nýskráningar bifreiða sem eru mjög ánægjulegar, miklu fleiri hreinorkubílar og aðrar vistvænni bifreiðar sem skipta máli líka, allt upp í 50% á þessu ári. Þetta skiptir máli. En við þurfum á sama tíma að ráðast í aðgerðir sem koma við matarsóun, kolefnisbindingu og að rétta af vistkerfin okkar sem hafa verið í hnignun á undanförnum árum. Þetta er í grundvallaratriðum sú forgangsröðun sem hefur verið skýr frá upphafi þessa kjörtímabils.

Rétt aðeins til að koma inn á þingsályktunartillögu Pírata um kjötið þá er það eitthvað sem ég hef ekki sökkt mér ofan í, verð ég að viðurkenna. En ég er mjög til umræðu um að skoða alla hluti eins og hv. þingmaður veit og við getum kannski spjallað um það síðar.