opinber fjármál.

Hæstv. forseti. Ég þakka hæstv. fjármála- og efnahagsráðherra fyrir framsöguna hér. Hann fór skilmerkilega yfir það sem þetta frumvarp felur í sér, að víkja lengur en þessi þrjú ár frá fjármálareglunum með það að markmiði samhliða að stöðva skuldasöfnun og að reglurnar taki aftur gildi 2026. Ég vil segja það hér að ég tel þetta afar skynsamlegt. Þetta er ábyrgt líka gagnvart stjórnmálunum og fram í tímann. En við þurfum líka að huga að sjálfbærniþættinum og ég tek undir með hæstv. ráðherra að við sendum reikninginn ekki þar með á komandi kynslóðir. En ef við horfum ískalt á þetta getum við líka almennt sagt að mikilvægt sé að reglur haldi óháð því hvernig vindar blása og hvort heldur það er í efnahagsmálum eða á öðrum sviðum. Þá kann einhver að segja: Reglurnar halda bara þegar góðæri er en ekki þegar það er kreppa.

Ég held að í þessu samhengi sé afar mikilvægt, eins og hæstv. ráðherra fór yfir, að þessi ár leggi fjármálaráð stöðugt og jöfnum höndum mat á að reglurnar taki aftur gildi 2026. En spurning mín er um hugleiðingar hæstv. ráðherra um þennan þátt, að reglurnar haldi í góðæri en ekki kreppu, og ég bið um rökstuðning í þeim efnum.